அன்புக்கொடி

அய்யா வழி சடங்கு முறைகள் இந்து மதத்திலிருந்து சற்று வேறுபட்டவைகளாகும்,
பூப்பெய்திய பெண்ணுக்கு நடைபெறும் சடங்கு முறைகள் 
                  அய்யா வழி மக்கள் பெண்கள் பூப்பெய்திய  நாளிலிருந்து 41 நாட்கள் கழித்து தான் சடங்கு முறைகளை நடத்துவர்.அதுவரை பூப்பெய்திய பெண் வீட்டார் புனித இடங்களுக்கு செல்வது கிடையாது.

                      அதன் பின்னர் ஒரு தாங்கலிலோ அல்லது தலைமை பதிக்கோ சென்று ஐந்து முறை பதம் எடுத்து எரிந்து தீட்டினை அகற்றி கொள்ளலாம். அல்லது வீட்டில் வைத்து சடங்கு செய்ய நினைப்பவர்கள் குருவையோ,அல்லது சீடரில் ஒருவரையோ வீட்டிற்கு அழைத்து,ஐந்து முறை பதம் எரிந்து தீட்டினை  போக்கி கொள்ளலாம்.விருந்து விழா நடத்துபவர்கள் திரு விளக்கு ஏற்றி ,வெற்றிலை,பாக்கு,பழம் படைத்து ஐந்து முறை மலர் தூவி பதம் தெளித்து தீட்டினை போக்கி கொள்ளலாம்.பூப்புனித நீராட்டு விழாவுக்கு வாழ்த்து பாடல் பாட வேண்டியதில்லை.
குழந்தை பிறந்த வீடு
              குழந்தை பிறந்த வீட்டில் உள்ளவர்கள் எல்லோருக்கும் பதினாறு நாட்கள் தீட்டாகும்.பெற்ற  தாய்க்கு 41 நாட்கள் தீட்டாகும்.அதுவரை புனித தலங்களுக்கு செல்லவது தவிர்க்கப் படுகிறது.

புதுமனை புகுவிழா
             புதுமனை புகுவிழா நடத்தும் போது குரு முறையில் இருப்பவரை விளக்கு ஏற்ற  வைத்து வெற்றிலை,பாக்கு,பழம் வைத்துச் சுத்தமான மண்பானையில் நாமம் இட்டு நடு வீட்டில் பால் காய்க்க  வேண்டும்.பால் பொங்கி வரும்போது குரவையொலி முழங்க "அய்யா சிவசிவ சிவசிவா அரகர அரகரா"எனும் மந்திரத்தை சொல்லிப் பாணையை  இறக்கி வைக்க வேண்டும்,பிறகு வெற்றிலை ,பாக்கு,பழம் வைத்த இடத்தில் நின்று போதித்து மாப்புக் கேட்டுப் பாலினைத் தருமம் இட்டு விருந்து நடக்கலாம்.
குழந்தைக்கு பெயரிடுதல்
                    குழந்தைக்கு பெயரிடும் போது "அய்யா நிச்சயித்தபடி (பெயர்) என்னும் பெயர் வைக்க வேண்டும்"என்று சொல்லிப் போதித்து ஐந்து முறை குழந்தையின் பெயரைக் கூறிக் குழந்தையின் மேல் பதம் தெளிக்க வேண்டும்.அதுபோல குழந்தைக்கு முடி இறக்கும் போது "அய்யா நிச்சயித்தபடி முடி இறக்க வேண்டும்" என்று சொல்லி போதித்து ,பின் முத்திரிப் பதம் தெளித்து முடி இறக்க வேண்டும்.குழந்தைக்கு முதலில் அன்னம் கொடுக்கும் போது ,தலைமை பதில்  உள்ள நித்தியப் பால் வாங்கி கொடுக்கலாம் முடியாதவர்கள் ,"அய்யா நிச்சயித்தபடி அன்னம் கொடுக்க வேண்டும்"என்று கூறி போதித்து முத்திரிபதம் சிறிது வாயில் இட்டு பின் அன்னம் கொடுக்க வேண்டும்.